Wanne abinci ya kamata mu rinka ci?

Wanne abinci ya kamata mu rinka ci?

Yayin da ake samun karin shawarwari masu karo da juna game da abinci mai rai da lafiya, me ya kamata mu rika ci domin mu zauna lafiya?

Gwamnatin Burtaniya a baya-bayan nan ta sake nazarin shawarwarinta kan irin abincin da yake gina jiki ta hanyar kallon hujjar da ke a bayyane.

Littafin da ke bayanin irin abincin da ya kamata mu rika ci na Eatwell Guide ya jero manyan rukunnan abinci guda biyar da ya kamata a ce muna ci, da kuma abubuwan da za mu takaita ci ko kuma kaucewa ci.

Kitse/Maiko

Kitse yana da muhimmanci a cikin abincinmu. Muna bukatar mu ci kitse domin mu zauna lafiya. Amma kuma kada mu rinka ci da yawa.

A littafin abinci na Eatwell Guide, kitse ya kunshi mai da kuma man shanu.

Ana daukar man zaitun da man girki a matsayin wadanda suka fi lafiya fiye da man alade da kuma man shanu. Amma ba kowa ba ne ya amince da haka.

Wasu na ganin cewa gwanda man shanu. Amma ka tabbatar cewa ba ka ci da yawa ba.

Madara

Madara da cuku da kindirmo a wasu lokuta na dauke da kitse- amma su ma ana samun abubuwan dake gina jiki da kuma wasu bitamin har ma da alli a cikinsu. Allin na da kyau ga kasusuwanmu. A cikin littafin irin abincin da ya kamata mu rika ci na Eatwell guide, sun kunshi kusan kashi shida na abincin da ya kamata mu ci

Akan iya lafta sukari kan wasu nau'in abincin masu dauke da madara a cikinsu, koma da ace suna kunshe ne da kitsen da bai ka kawo ba

Kamata ya yi dai ka rinka cin abincin da babu kitse da kuma sukari sosai a cikinsu kamar tsurar kindirmo

Abinci mai kara kuzari

Wannan wani na'uin abinci ne da ake takaddama akansa tsakanin masu bayar da shawarar irin abincin da mutum zai ci.

Hakkin mallakar hotoSCIENCE PHOTO LIBRARY

Wasu na cewa an mayar da hankali sosai a kan abinci kamar biredi da dankali, kuma cin su da yawa ka iya janyo karuwar hadarin kamuwa da cutar suga.

Gwamnati ta ce irin wadannan nau'ikan abinci suna da kyau wajen samun karfin jiki, kuma kamata ya yi abincin da muke ci ya kasance yana dauke ne da sama da kashi uku na wannan nau'in abincin.

Kayan itace da kuma ganye

Wannan shi ne nau'in abincin da ya kamata a ce muna ci - duk da haka da yawa daga cikinmu ba sa cin wadataccen 'ya'yan itatuwa da kuma ganye.

Hakkin mallakar hotoSCIENCE PHOTO LIBRARY

Kamata ya yi su kunshi kashi uku na abincin da muke ci a kulli yaumin saboda suna dauke da bitamin da abinci mai harza da kuma Minerals.

Sai dai ka yi hankali da lemukan gwangwani na 'ya'yan itatuwa saboda suna iya dauke da suga da yawa a cikinsu. Shi ya sa ya kamata ka takaita shan irin lemukan 'ya'yan itatuwa zuwa abin da bai wuce 150ml a rana ba.

Abinci mai gina jiki

Nama shi ne abin da ya fi, amma kifi da wake da kwai da gyada su ma ana samun sinadaran gina jiki a cikinsu.

Hakkin mallakar hotoSCIENCE PHOTO LIBRARY

Sai dai ka sake tunanin wasu abubuwan kuma da ke ciki wannan nau'in abinci. Nama ka iya kasancewa yana dauke da kitse. Haka kuma ana iya samu wani nau'in suga cikin wani waken gwangwanin.

Kodayake kifin sardines da na salmon yana da kyau ga lafiyarmu amma kada mu ci fiye da kima a cikin mako guda.

Abincin da za a kauracewa

Abinci da a zahiri yake barazana ga lafiyarmu da kuma wanda za a takaita ci ko ma a daina ci su ne irinsu kek da cakulan da lemukan da ke dauke da suga.

Hakkin mallakar hotoSPL

Akwai abinci da yawa da ke kunshe da gishiri da yawa da kitse da suga amma ba nan take mai cinsu yake kula ba.

Abin da za ka sha

Kamata ya yi manya su sha kusan kofi takwas na ruwa a kowacce rana. Shayi da kuma kofi ka iya kasancewa ciki.

Haka ma lemon dan itace shi ma ya kan iya zama ruwa amma kada ka sha fiye da kofi daya saboda yana dauke da suga.

Barasa ba ta cikin littafin abinci na Eatwell Guide. Tana dauke da suga sosai.